Елімізде сыбайлас жемқорлық мәселесі қашан да өткір болып келеді, әсіресе мемлекеттік органдарда. Ranking.kz тобы ел әкімдіктері қызметкерлерінің сыбайлас жемқорлық құқық бұзушылықтарына талдау жасады.
2022 жылдың қаңтар–шілде айларында мұндай құқық бұзушылықтарды әкімдіктер мен олардың құрылымдық бөлімшелерінің 91 қызметкері жасаған. Бұл соңғы жылдардағы рекордтық көрсеткіш. Мәселен, 2021 жылдың дәл осы кезеңінде 87 жемқор шенеунік қолға түскен. Айта кетейік, 2021-2022 жылдары сыбайлас жемқорлық құқық бұзушылық жасаған әкімдіктер қызметкерлерінің саны өткен жылдардағы көрсеткіштерден айтарлықтай асып кеткен (салыстыру үшін: 2020 жылдың сәйкес кезеңінде 11 құқық бұзушы, 2019 жылы — 23, 2018 жылы — 22).
Сыбайлас жемқорлық құқық бұзушылықтар баптары аясында әкімдіктердің барлық қызметкерлерінің көпшілігі мына қылмыстар үшін жауапкершілікке тартылды:
• сеніп тапсырылған бөтен мүлікті иемденіп алу немесе талан-таражға салу (ҚР ҚК 189-баб. 3-бөл. 2 т.) — 28 адам;
• пара алу (ҚР ҚК 366-бабы) — 26 адам;
• пара беру (ҚР ҚК 367-бабы) — 19 адам;
• алаяқтық (ҚР ҚК 190-бабының 3-бөлігі 2-тармағы) — 14 адам.
Өңірлер бойынша Түркістан облысы бойынша әкімдіктер қызметкерлерінің басым бөлігі сыбайлас жемқорлық құқық бұзушылықтарымен ұсталды — 13 адам.
Облыс әкімдіктеріндегі сыбайлас жемқорлық мәселесі қашан да өткір болып келеді. Еске салайық, дәл осы сыбайлас жемқорлық дауына байланысты ағымдағы жылдың 26 тамызында Түркістан облысының бұрынғы әкімі қызметінен кеткен болатын. Бұған дейін Өмірзақ Шөкеев Кентау қаласының бұрынғы әкімі Дәурен Махажанов аса ірі көлемде пара алғаны үшін кінәлі деп танылса, қызметінен кетуге дайын екенін мәлімдеген. Нәтижесінде Кентаудың экс-әкімі 10 жылға бас бостандығынан айырылды, деп хабарлайды Forbes.kz.
Жемқорлық құқық бұзушылар саны бойынша көшбасшылар қатарында Қызылорда облысы (11 адам) мен Шымкент қаласы (9 адам) да бар.
