Қазақстандық банктердегі активтердің сапасы өте жақсы деңгейді көрсетеді. Мәселен, жылдың бірінші айының қорытындысы бойынша ҚР ЕДБ-нің несие портфелі 29,4 трлн теңгені, ал 90 күннен астам мерзімге кешіктірілген қарыздар — 888 млрд теңгені немесе портфельдің тек 3%-ын құрады. Салыстыру үшін: бір жыл бұрын NPL 90+ үлесі ҚР ЕДБ қарыздарының жиынтық көлемінің 3,4%-ын, бес жыл бұрын — 8,1%-ын, ал он жыл бұрын — 32,2%-ды құрады. Яғни, он жыл ішінде несие портфеліндегі NPL 90+ салмағы он еседен астам қысқарды.
ҚР ЕДБ несиеге қол жеткізу критерийлеріне өте қатаң қарайды. Мәселен, мысалы, ҚР Ұлттық банкінің зерттеу нәтижелері бойынша өткен жылдың соңғы тоқсанында несиелік өтінімдерді мақұлдау деңгейі өте қалыпты болды.
Мысалы, кепілсіз тұтынушылық несиелер сегментінде берілген барлық өтінімдердің мақұлданған үлесі небәрі 28,6%-ды, ипотека бойынша — 32%-ды, кепілді тұтынушылық несиелер бойынша — 36,3%-ды құрады. Бизнес-несиелерге келетін болсақ, мұнда шағын кәсіпкерлік субъектілері үшін қарыздарды мақұлдау үлесі 36,5%-ды, орта кәсіпкерлік субъектілері үшін 42,9%-ды құрады және ірі кәсіпкерлік сегментінде ғана көрсеткіш 75,6%-ға жетті.
