2023 жылдың 1 қыркүйегіндегі жағдай бойынша, қазақстандық екінші деңгейлі банктердің реттеуші меншікті капиталы бір айда 3,4% өсіп, 6,8 трлн теңгеге жетті. Бұл ретте былтырғы сәйкес кезеңмен салыстырғанда өсім бірден 18,5%-ды құрады.
Реттеуші меншікті капитал банк жүйесінің қаржылық тұрақтылығы мен тиімді жұмыс істеуінің негізгі факторы. Ол мүмкін болатын шығындарды жабу және оның қызметінің сенімділігін қамтамасыз ету үшін банктің қарамағында болуы тиіс қаржылық резервті білдіреді.
ҚР-ның екінші деңгейлі 10 жетекші банкінің ішінде меншікті капиталдың ай сайынғы ең үлкен өсімін Отбасы банк көрсетті: бірден 8,9% көбейген. Капитал жеткіліктілігінің коэффициенттері (k1, K1-2, k2) 2023 жылғы 1 қыркүйектегі жағдай бойынша 32,8% — бұл сектордағы ең жоғары көрсеткіштердің бірі. Сонымен қатар, бір жыл ішінде меншікті капиталдың көлемі айтарлықтай 35,1% өсті — бұл үздік ондықтағы ең жоғары көрсеткіш. Тұрғын үй-құрылыс жинақтары жүйесін енгізу арқылы банк еліміздегі ең тұрақты және сенімді қаржы институттарының біріне айналды, оны басқа көрсеткіштер де көрсетеді.
Бұл ретте Jusan Bank реттеуші меншікті капиталдың ай сайынғы өсімі бойынша екінші орында: 6,8% көбейген. Үздік үштікті 6,1% өсіммен Kaspi Bank жабады.
Үздік бестікке ЦентрКредит банкі (3%) және Halyk Bank (2,2%) кірді.
Жалпы, Қазақстанның банк секторында капитал қоры жеткілікті. Негізгі капиталдың жеткіліктілік коэффициенті (k1) 19%, ал меншікті капиталдың жеткіліктілік коэффициенті (k2) 21,6%, бұл орта есеппен заңнамада белгіленген нормалардан айтарлықтай асып түседі және банктерге барлық ықтимал тәуекелдерді жабуға мүмкіндік береді.
Банктер үшін реттеуші меншікті капиталдың маңызы — қаржы институттарының сенімділігі мен тұрақтылығын және олардың клиенттерін қорғауды қамтамасыз етуде.
