2024 жылдың қорытындысы бойынша сыбайлас жемқорлықты қабылдау бойынша жаһандық елдер рейтингісінде Өзбекстан 28 индексімен 180 елдің ішінде 126-ыншы орынды иеленді. Түсіндіре кетейік, индекс неғұрлым жоғары болса, елдің жемқорлыққа бейімділігі соғұрлым төмен, бұл рейтинг 0-ден (өте жемқор мемлекет) 100-ге (жемқорлықтан мейлінше таза ел) дейінгі шкаламен өлшенеді. Өзбекстан бұл орынды индексі дәл сондай (28) Ангола, Эквадор, Кения, Шри-Ланка және Того елдерімен бөлісті
Индекс елдер мен аумақтарды мемлекеттік сектордағы жемқорлықты қабылдау деңгейіне қарай бағалап, белгілі бір тәртіппен орналастырады. Әр елдің көрсеткіші кемінде үш дереккөзден алынған ақпаратқа негізделген, деректер 13 түрлі зерттеулер мен бағалаулардан жиналды. Мұндай деректерді Дүниежүзілік банк пен Дүниежүзілік экономикалық форумды қоса алғанда, түрлі беделді институттар жинайды.
Өзбекстан туралы сараптамалық дерек: сарапшылардың деректеріне сәйкес соңғы он екі айда республикада мемлекеттік қызметтерді пайдаланған азаматтардың 13%-ы пара берген.
Басқа елдерге де назар аударайық. Рейтингте көш бастап тұрған елдер — Дания, Финляндия және Сингапур, ал аутсайдерлер қатарында — Оңтүстік Судан, Сомали және Венесуэла. Өзбекстанмен салыстырғанда, Дания мен Финляндияда пара бергендер үлесі небәрі 1%-ды құрайды.
Өзбекстан ТМД елдері арасында шамамен тізімнің ортасында орналасқан. Жоғарырақ орындарға Армения (63-інші орын), Молдова (77-інші), Қазақстан (88-інші), Украина* (105-інші) және Беларусь (114-інші) жайғасты. Ал Өзбекстаннан төмен Қырғызстан (146-ыншы орын), Әзербайжан мен Ресей (екеуі 153-інші орынды бөлісті), Тәжікстан (164-інші) және Түркіменстан (167-інші) елдері орналасты.
* Украинаның ТМД құрамындағы мәртебесі бірқатар себептерге байланысты нақты емес.
