ҚР СЖжРА Ұлттық статистика бюросының деректеріне сәйкес, 2024 жылғы тамызда Қазақстанда тұрғын үйді жалға алудың орташа құны жылдық мәнде 4,2%-ға қымбаттап, шаршы метрі үшін 4,4 мың теңгені құрады.2018 жылдан 2023 жылға дейінгі кезеңде абаттандырылған тұрғын үйді жалға алудың орташа құны 3,5 есе — 1,4 мыңнан 4,9 мың теңгеге дейін өсті. Серпіліс 2022 жылы ресейлік релоканттар үшін сұраныс артқан кезде болды. Дүрбелең төмендегеннен кейін жағдай тұрақтанды, бірақ бұрынғы деңгейдегі көрсеткіш болған жоқ. Бағалар әлі де бір шаршы метрге 4 мың теңгеден жоғары деңгейде ұсталады.
Ең қымбат жалға берілетін пәтерлер — астаналарда. Мегаполистердегі баға белгілері тұрғын үйді жалға алу құнының республикалық көрсеткішін едәуір жоғары етеді. Елдің басқа ірі қалалары орташа мәнге жетпейді. Мысалы, Алматыда жалдау құны 5,3 мың теңге, Астанада бір шаршы метрге 4,6 мың теңгені құрайды. Осылайша, ауданы 50 шаршы метр болатын екі бөлмелі шағын пәтерді жалға алу үшін алматылықтарға ай сайын 264 мың теңге, астаналықтарға 230,8 мың теңге төлеу қажет болады. Агрегаторлардағы жарнамаларды талдауға қарағанда, бұл сомалар орташа баға диапазонын көрсетеді. Сол аудан көлемінде 350–500 мың теңгеге жалға берілетін, тіпті одан да көп пәтерлер бар.
Көптеген облыс орталықтарында жалдау құны бір шаршы метрге 3 мың теңгеден аспайды. Ең арзан жалдау нұсқалары өндірісі шағын дамыған Тараз, Түркістан қалаларында ұсынылады: тиісінше бір шаршы метрге 2,1 мың және 2,4 мың теңге.
