Сектордағы жоғары импорттық тәуелділік бағадан да көрінеді: өнім бағасының өсуі инфляцияның орташа көрсеткіштерінен әлдеқашан асып кетті. Мысалы, биыл маусымда ҚР-да жуғыш және тазалау құралдары 36,2%, жеке пайдалану заттары 24,6% қымбаттады. Бұл ретте азық-түлік емес тауарлар бағасының жалпы жылдық өсімі 15,8% шегінде, ал инфляцияның орташа деңгейі 14,6% болды.
Дегенмен, биыл жыл басындағы сектордағы өнімдердің баға белгілерінің қалай өзгергенімен салыстырғанда бағаның жазғы көтерілу деңгейі төмен деуге болады. Қаңтар–наурызда статистика тазалыққа арналған тауарлар құнының 51,5%–53,9%, жеке пайдалануға арналған бұйымдардың 40% қымбаттағанын тіркеді. Бағаның ең жоғары өсуі кір сабын (90,3%) және дәретхана сабынында (53,8%) байқалды.
Отандық тауар өндірушілердің рөлін ҚР СЖРА Ұлттық статистика бюросының ресурстар мен пайдалану баланстарынан көруге болады. Мәселен, биыл қаңтар–мамырда кеңейтілген алты тауар тобының төртеуі бойынша ішкі нарықтағы сатудағы шетелдік жеткізушілердің үлесі 98%-дан 100%-ға дейін ауытқиды. Тіс пастасы, әр түрлі тазалау және жуғыш заттар, сусабындар, шашқа арналған косметика сатуда импорт басым болды.
Қырынуға арналған өнімдер, ваннаға арналған композициялар, дезодоранттар санатындағы қазақстандық өндірушілер үлесі 45,7%. Отандық сабын жасаушылар да осындай көрсеткіштермен мақтана алар еді: елімізде сатылған 20,3 мың тонна түрлі сабынның 10,7 мың тоннасын толығымен Қазақстанда дайындауға болады. Алайда, бұл көлемнің жартысы ғана, яғни 5,3 мың тоннасы қазақстандық дүкендердің сөрелеріне түссе, қалғанын сабын жасаушылар шетелге экспорттаған. Нәтижесінде сабын және бетке жағатын белсенді заттар санатындағы қазақстандық тауарлардың үлесі 26,4%-ды құрады.
