2023 жылдың сәуір–маусым айларында бұл тәтті өнімнің құны жылдық мәнде 29,3% қымбаттады. Үстеме баға елдегі жалпы азық-түлік инфляциясынан әлдеқайда жоғары болды, ол екінші тоқсанда 16,3%-ды құрады.
Балмұздақ бағасының инфляциядан едәуір асып түсу қарқыны өткен жылдың жазында байқалғанын атап өтуге болады. Одан кейін 28,5% қымбаттады, ал азық-түлік бағасы жалпы алғанда 20,9% өсті. Одан әрі тағы қымбаттай түсті. Биыл жыл басында балмұздақтың қымбаттауы 33,5% болды.
Дегенмен, сатылым нәтижесінен көрініп тұрғандай, қазақстандықтар үшін қымбатшылық ыстықта сүйікті тәттілерінен бас тартуға себеп емес. Балмұздақ нарығы бір жыл ішінде 42,3% өсті. Жеті айда елде 40,1 мың тонна балмұздақ сатылса, былтыр сәйкес кезеңде сатылған өнім небәрі 28,2 мың тонна болған. Қазақстандықтардың балмұздаққа деген сұранысын негізінен жергілікті өндірушілер қанағаттандырды. Былтыр қаңтар–шілде айларымен салыстырғанда балмұздақ өндірісі 43,5% көбейді. Жеті айдың ішінде қазақстандық кәсіпорындар 36,6 мың тонна экскимо, кесе және салмақтап балмұздақ шығарды. Бір жылдан аз уақыт ішінде бұл өте жақсы көрсеткіш. 2021 жылға дейін өндірушілер бір жыл ішінде мұнша көп балмұздақ шығарған жоқ.
Қазақстандағы балмұздақ нарығының басым бөлігін отандық кәсіпорындар алып жатыр. 2023 жылғы қаңтар-шілдеде сатылымның жалпы көлеміндегі өндіріс үлесі 80,6%-ды құрады. Сатылған 40,1 мың тонна балмұздақтың 36,6 мың тоннасы Қазақстанда жасалған. Нарықтың қалған бөлігін импорт алды. Сондай-ақ, қазақстандық балмұздақшылар елімізде өндірілетін тәтті өнімнің оннан бір бөлігін экспортқа шығарды.
